भाषाएँ

কির্চৗগ্লী

ভুদা হাপ

কুনবৗ তারিলৗ একরা ঘুপানি একং দাঙসা হুলুং থাকিবৗন ব্লে।
আরো ঐ হুলুংতে একরা বুরৗ ভুদা হাপ থাকিবৗন।
ঐ হুলুংতেই ভুদা হাপরা বাখার দিনৗ থকন পুরিয়ৗ থাকিবৗন ব্লে।
ভুদা হাপরা হুলুংতে পুরিয়ৗ থাকিয়ৗ ভকতে মরং-মরং হুয়ৗ ভগবানগে বাৰ মাগিয়ৗ কলে, “হাই ভগবান ময় কী ইংকৗকেই
ভকতেই মরিবো মলা উফুরনি তলা কী আরো একতিপাও মায়া নৗই?”
ভগবানরা ভুদা হাপলা বাৰ মাগাৰা হুনিয়ৗ মায়া লাগিলে আরো ঘুগ্লা-ব্যাং একরা পাথে দিলে।
কিন্তু ঘুগ্লা-ব্যাংরা তাম্তে ভগবানলা ভক্ত হুবৗন।
ভুদা হাপরা মুখ আগতে ব্যাংরাগে দিখিয়ৗ লগেলগে হা কে মুখরৗ মেলেয়া ঘৗপৗতকে ব্যাংরাগে ধরিলে।
ঘুগ্লা-ব্যাংরা ইংকৗ নখন দিনৗ দিখিবৗ লাগাতে মননি খুব দুক পালে।
আরো অয় ভগবানগে পুসি চাৱা নখন বাৰ মাগিয়ৗ কয়, “ময় কী পাপ কুরিলে ভগবান?”
মগে ইংকৗ নখন দিনৗ দিখালে।”
ভগবানরা বেকং ঝনলা বাৰ মাগাৰা হুনিয়ৗ কী করং নাকরং হুলে।
আরো পাসেকন উগ্লৗলৗ কানওতেই কৱৗ নখনকে কলে, “জিঙ্কৗই হুসে উংকৗই থৗক।”
ঘুগ্লা-ব্যাংরা ভগবানলা কথারা বুজিলে আরো অয় হাপরালা মুখনি মুরা নখন কুরিয়ৗ থাকিলে।
ভুদা হাপরা ব্যাংরাগে মুরিলে কে ভাবিয়ৗ মুখরৗ মেলেয়া গিলিবৗ চাৱাতে ফলককে ফাল দিয়ৗ পালালে।
বুরৗ ভুদা হাপরা হা কে চৗয়ৗই থাকিলে।
“জালা বুরাত নৗই বিয়ৗ ঘরতেও ভাত নৗই।”

কৗওয়ৗ আরো চরেকানি

একরা চরেকানি আরো একরা কৗওয়ৗ বেকং ঝন খুব ভালা লগ হুবৗন বলে।
বাখার দিনৗ আগে কৗওয়ৗরৗহে খুব সুন্দুর দিখিবৗন আরো চরেকানিরৗহে বেধকা হুবৗন বলে।
উগ্লৗ বেকং ঝন বেকং ঝনলা দুক-সুকনি হাসে কান্দে।
এক দিনৗ চরেকানিরৗগে আলগা পুখীগ্লৗ উমৗগ্লৗ লগে খাবা দাকালে।
চরেকানিরৗ নিজৗগে বেধকা দিখেবেদে জাবা লাস পৗয়ৗ কৗওয়ৗরৗগে কয়, “হুমাস তই কী মগে তলা ধকরা দিবো?”
কৗওয়ৗরৗ চুংখইয়ৗ কয়, “মলা সুন্দুর ধকরা তগে কেনে দিবো?”
চরেকানিরৗ বিবাক কুথাগ্লৗ কৗওয়ৗরৗগে কলে
কৗওয়ৗরৗ কয়, “ময় তগে মলা সুন্দুর ধকরা দেবা পাবো কিন্তু তই মগে কুথা দেবা লাগবো জি, তই আবার উদৗ ঘুরয়ৗ দিবো
তাহলে হে ময় তগে মলা ধকরা দিবো।”
চরেকানিরৗ খুসি হয়ৗ কৗওয়ৗলৗ সুন্দুর ধকরা নিয়ৗ আলগা পুখীগ্লৗ লগে খাবা জালে।
চরেকানিলৗ আলগা পুখী হুমাসগ্লৗ অগে বুদ্দি দিলে জি, কৗওয়ৗলৗ সুন্দুর দিখারা অগে আবার ঘুরিয়ৗ দিবা নালাগে।
চরেকানিরৗও অলা আলদা লগগ্লৗলৗ কুথা হুনিয়ৗ ধরে ফিলালে।
কৗওয়ৗরৗ বেছারা ভিয়ৗন থকন বিলা ভাতি পৗয়ৗ বাস্নেয়া থাকিলে কিন্তু চরেকানিরৗ কুনুদিনৗও ঘুরে নাআহিলে আরো ঘুরে নাদিলে।
উদৗবেদেহে চরেকানিরৗ আসকৗ এত্তই সুন্দুর দিখে আরো কৗওয়ৗ বেছারা কালা চুকচুকৗ বেধকাকে থাকিবৗ লাগিলে।