भाषाएँ

তুৰৗ

আয় আৰ সুন্তুস্ত হ তুৰৗ থিকি। ইদৗ ৱেচত গাৰ শিলচলৗ মৗথৗই জাগা, সুটু-মুতু চা খাৱা জাগা ভৰা, দোকান ভৰা আৰ গোটাই গাৰ শিলচনি বেক চৗয়ৗ ভালা খাৱানজাগাগ্লৗ আছে। তুৰৗৰৗ সুটুসৗ তাউন আৰ ঘুৰিবৗগে সহজ। অতনি হুজৗও বা ঠেং দিয়ৗ নিমুকসিমুককে তাউনদৗ বেৰাও আৰ পতে-ঘাতে বেচাবাগ্লৗ মাথানি তাম্রেয়া নেও। ইদৗ তুৰৗ পাহাড়লা গোৰনি উজৗন দিগিকে আৰ ৰংগিৰৗ পাহাড়লা নেবৰা-ভাটি দিগিকে আছে। তুৰৗৰৗ গাছ দিয়ৗ ঢাকা।

তুৰৗনি আপবাতাচ
তুৰৗলৗ আপবাতাচজা বিচি তুতাও নাহয় বিচি জাৰওনাহয়। তুৰৗনি বছৰৰা চৗৰটৗ ভাগ আছে। ফেব্ৰুৱৗৰি থিকি মাৰস মাসজা, জাৰও নৗই তুতাও নৗই, এপ্রিল থিকি জুন মাসজা তুতা হবা ধৰে। জুলৗয় থিকি শেপতেমবৰ মাসজা বৗর্ষৗ হবা ধৰে আৰ দিনদৗ গৗডলৗ। জাৰকালিৰৗ দিসেমবৰ থিকি জানুৱাৰি পৗয়ৗ হয় আৰ জাৰ পুৰি। তুৰৗলৗ সগল ভলায়লা আপবাতাচজা ২৭°C থিকি ৩০°C ভিতুৰনি থাকে, তুতা দিন ভলা, বিশি তুতাৰা ৩২°C আৰ ৩৫°C –লৗ ভিতুৰনি উঠি।আৰ ১৫°C থিকি ২০°C –লৗ ভিতুৰনি হয়, জাৰকালি ভলা, জানুৱাৰি মাসজা বেক চৗয়ৗ জাৰ, (১০°C-লৗ তলনি নামে)।

তুৰৗনি ইনতাৰনেত

তুৰৗনি ইনতাৰনেত দিয়ৗ কাম কুৰিবৗগে কম লৗয়িন আৰ আস্তে চলে আৰ সগল ভলায় নেথা বেদেন ইনতাৰনেত ভালা পাৱাগ্লৗগে ভালা নালাগিবো। তুৰৗনি ঘৰে-দুৱৗৰৰে বা মবায়িলনি ইনতাৰনেত আছে, তে তুৰৗনি ইনতাৰনেতলা দোকানগ্লৗ সিতৰাগেন্দাকে নৗই।

তুৰৗনি কম পইচৗ দিয়ৗ ভালাকে খা
তুৰৗনি বেক দৰলা ভালা-ভালা খাৱান আছে। তই বেঙ্ক থিকি টেকা নাবৗৰকৗয়কে ভালাকে খাবা চালে, তলা খাৱানৰা পাবাগে অৗৱৗল-অৗৱৗল জাগাগ্লৗ দুমৗল বানিয়ৗ আছে। তাউনলৗ পথ কুলাগ্লৗনি বেক চৗয়ৗ

ভালা খাৱানজাগাগ্লৗ ভৰা, সুটুই ডাঙই, পাকা দিয়ৗ বানানিও আছে শাপ্রাকে বানানিও আছে, যিদৗতে তই তলা মন খাৱা দৰনি কিনিবৗ পায়।

তুৰৗনি ইংৰৗজি কোৱা
তুৰৗলৗ মৗনগ্লৗ ইংৰৗজি কবাগে খুব ভালাকে পায় আৰ তই তলা আহা জাগালা ভাষাৰা নাজানিলেও, তাউননি বা গোটাই গাৰ শিলচনি চাবা বৗৰৗবৗগে সহজ। তুৰৗলৗ মৗনগ্লৗ ঝিৰিয়ৗ মুজুন ইংৰৗজি দিয়ৗ হাতাপাতিকে দেবাগন ৰং পায় কে তই জানিবো।

তুৰৗনি ভাৰা গাড়ি
এলা তুৰৗনি ভাৰা গাড়ি আছে, কিন্তু গাড়ি চালাবাগে তুৰৗৰৗ ভালা নাহয়। পথগ্লৗ চিপৗ আৰ লেৰপেতা। কিন্তু ৰং চাৱা জাগাগ্লৗ দূৰ নাহয়। তই তুৰৗ পথলা নিয়ৗমগ্লৗ পালিয়ৗ মুজুন যালে আৰ ভালাকে চালালে, তই হৗচৗয়কেনে খুব ভালাকে বন্ধদিনদৗ ৰং হবা পাবো। তুৰৗলৗ
আদুৰনি থাকা বেক চৗয়ৗ ভালা জাগাগ্লৗ তই ধৰধৰ-পৰপৰকে চাবা তাল পাবো, আদুৰনি থাকা চাং-চাং কোৱা জাগাগ্লৗ ভায় যা আৰ তুৰৗ আৰ তুৰৗলৗ মৗনগ্লৗলৗ জিঙিয়ৗ থাকাৰা ভালাকেই চৗয়ৗ যানিয়ৗ নেও।

আগপাটা, <<< 1, >>> 2, >>> 3